Մշակութային ծրագրեր
«Թեքեյան Կենտրոն» հիմնադրամը ակտիվ գործունեություն է ծավալում նաեւ մշակույթի ոլորտում: Համագործակցելով պետական կառույցների, հասարակական կազմակերպությունների, անհատների հետ, ԹԿՀ կազմակերպում է տարատեսակ ձեռնարկներ, այդ թվում՝ համերգներ, գրքի շնորհանդեսներ, ցուցահանդեսներ, հանդիպումներ՝ նվիրված ականավոր մտավորականների գործունեությանը:
Վերջին տարիներին հիմնադրամը կենտրոնացել է մասնավորապես բազմաժանր ցուցահանդեսների վրա, հայ ժամանակակից արվեստագետներին լայն հանրությանը ներկայացնելու նպատակով:
ԹԿՀ կարեւորում է ազգային եւ միջազգային լուսանկարչական ցուցահանդեսները, քանի որ նրանք օգնում են զարգացնել եւ տարածել լուսանկարչական արվեստը: Կազմակերպելով տարեկան շուրջ հինգ ցուցահանդես, հիմնադրամը նպատակ ունի ճանաչելի դարձնել ժամանակակից լուսանկարչությունն ու հեղինակներին, ներմուծել ավելի բարձր ու մասնագիտական չափանիշներ, ինչպես նաեւ բարձր գնահատանքի արժանացնել լավագույն լուսանկարիչներին արվեստի այս ուղղության մեջ իրենց ներդրման եւ ձեռքբերումների համար:
Կատարելով իր առաքելությունը մշակույթի ոլորտում, ԹԿՀ համագործակցում է Հայաստանի Թեքեյան մշակույթի միության /ԹՄՄ/ հետ, որն իր ուրույն տեղն է զբաղեցնում հայության մշակութային եւ հասարակական կյանքում: ԹՄՄ հատկապես առանձնանում է իր ձեռնարկների բազմազանությամբ ու կարեւորությամբ: Դրանց թվում են «Վահան Թեքեյան» ամենամյա եւ «Հայկաշեն Ուզունյան» երկամյա մրցանակաբաշխությունները, որոնք պարբերաբար տեղի են ունենում Թեքեյան Կենտրոնում: