«Թեքեյան Կենտրոն» hիմնադրամը խորին շնորհակալություն է հայտնում Թեքեյան մշակութային միությանը ՀԽՍՀ մշակույթի վաստակավոր գործիչ, հայտնի մանկավարժ, պատմական գիտությունների թեկնածու, պրոֆեսոր Կարլեն Միրզախանյանի անձնական հավաքածուն ԹԿ հիմնադրամի «Հայկաշեն եւ Մարի Ուզունյան» գրադարանին նվիրաբերելու համար: Ավելի քան 700 հայալեզու եւ ռուսալեզու գրքերից բաղկացած հավաքածուի հիմնական ուղղվածություններն են պատմությունը, արվեստը, ականավոր քաղաքական եւ մշակութային գործիչների կենսագրականները, սփյուռքահայ գրականությունը եւ այլն:

Կարլեն Միրզախանյանը ծնվել է ճանաչված իրավաբանի եւ պատմաբանի ընտանիքում: Ավարտել է Երեւանի պետական համալսարանի իրավագիտության ֆակուլտետը, այնուհետեւ թեկնածուական է պաշտպանել պատմությունից:

Իր գիտական նախաձեռնություններով զգալի ներդրում է ունեցել հայկական համալսարանական կրթության ոլորտում՝ հեղինակելով պատմամշակութային թեմաներով չորս գիրք:

Կարլեն Միրզախանյանն առավել հայտնի է որպես 1969 թվականին Հայկական պետական մանկավարժական համալսարանի կուլտուրայի ֆակուլտետի հիմնադիր եւ առաջին դեկան։ Նա ավելի քան երեք տասնամյակ նվիրել է այս ֆակուլտետի կառավարմանն ու զարգացմանը՝ այն վերածելով Հայաստանում մշակութային գործիչների կրթության առաջատար կենտրոնի։