Արցախի Հանրապետութիւն կատարած շրջայցի ծիրէն ներս, ՌԱԿ Կեդրոնական Վարչութեան գանձապահ եւ «Թէքէեան Կեդրոն» հիմնադրամի հոգաբարձուներու խորհուրդի նախագահ՝ Ընկ. Վարդան Ուզունեանը, ընկերակցութեամբ ՌԱԿ Կեդրոնական Վարչութեան անդամ Ընկ. Ալեքսան Գարատանայեանի եւ Հալէպի Հերեան Ակումբի նախկին ատենապետ Ընկ. Տիգրան Չալեանի, մեծ ընդունելութեան արժանացան Արցախի Քաշաթաղի շրջանի Բերձոր քաղաքի Վահան Թէքէեանի անուան N-1 միջնակարգ դպրոցի տնօրէնութեան կողմէ:
Հիւրընկալուած ընկերները շրջեցան դպրոցէն ներս, եղան վերանորոգուած դասասենեակները, իրենց գոհունակութիւնն արտայայտեցին կատարուած աշխատանքներու կապակցութեամբ:
Հիւրերը ընդունելութեան համար դպրոցի տնօրէնուհի Անահիտ Քոսակեանին եւ ուսուցիչներուն շնորհակալութիւն յայտնելով, իրենց խօսքին մէջ շեշտեցին, որ, ուրախալի եւ պարտաւորեցնող է սեփական աչքով տեսնել նման բանիմաց, խելացի ու կրթութիւնը կրթօճախին մէջ կազմակերպել ցանկացող մարդոց: Ընկ. Վարդան Ուզունեան ի պաշտօնէ հաւաստիացուց, որ այս հանդիպումները շարունակական բնոյթ պիտի կրեն եւ ամէն հնարաւորը պիտի ընեն, որպէսզի տեղը աշակերտութիւնը իրենց կրթութիւնը ստանան վերանորոգուած եւ գեղեցիկ դպրոցի մէջ:

                                                                                                                                                        Անի Չալեան