Երգիծանկարիչ, գեղանկարիչ, օպերային բեմադրիչ Սուքիաս Թորոսյանի` Toto-ի 60-ամյակի առթիվ Թեքեյան կենտրոնում տեղի ունեցավ երկու իրադարձություն` նրա երգիծանկարների ցուցահանդեսի բացումը եւ «Փոքր երկրի մեծ իրադարձությունները» երգիծանկարների ժողովածուի շնորհանդեսը:

Ժողովածուում կարելի է գտնել անկախությունից հետո Հայաստանում տեղի ունեցած քաղաքական իրադարձությունների արձագանքը, ինչպես նաեւ Հայաստանի հայտնի պետական գործիչների երգիծանկարները Toto-ական մեկնաբանություններով:

Ժողովածուի հովանավորներն են ԹՄՄ ԱՄՆ/Կանադայի Կենտրոնական վարչությունը, «Ազգի» հիմնադիրներից Միհրան Մինասյանը: Իսկ «Թեքեյան Կենտրոն» հիմնադրամը սիրով տրամադրել էր ցուցասրահը, ինչպես նաեւ պատվոգիր հանձնեց Սուքիաս Թորոսյանին` ազգային մշակույթի ոլորտում երկարամյա արդյունավետ գործունեության եւ ակնառու վաստակի համար: