Առաքելությունը
«Թեքեյան Կենտրոն» hիմնադրամի նպատակն է կրթական, մշակութային եւ մարդասիրական ծրագրերի միջոցով նպաստել ազգային ինքնության եւ մշակութային ժառանգության պահպանմանն ու տարածմանը, նոր սերնդի հայեցի դաստիարակությանը, Հայաստան-Սփյուռք-Արցախ կապերի ամրապնդմանը:
«Թեքեյան Կենտրոն» hիմնադրամի
հոգաբարձուների խորհրդի նախագահի ուղերձը
«Այս ծրագիրը առաջիններից մեկն էր, որ նախաձեռնվեց Հայաստանի անկախությունից քիչ անց եւ հակառակ ժամանակի ծանր պայմաններին, հաջող ավարտ ունեցավ: Ծրագիրը նաեւ սփյուռքում ապրող բազմաթիվ հայերի նվիրական երազանքն էր` ունենալ Հայրենիքում մի հարազատ եւ հյուրընկալ օջախ, որը նաեւ խորհրդանիշ հանդիսանար մեր ժողովրդի, հայրենի հողի եւ աշխարհատարած սփյուռքի միասնության եւ հարատեւության: Այն նաեւ անկախ Հայաստանի եւ նրա ապագայի հանդեպ վստահության առաջին դրսեւորումներից մեկն էր:
Այս նպատակի շուրջ հարյուրավոր հայրենակիցներ համախմբվեցին եւ իրենց թե՛ նյութական եւ թե՛ բարոյական օժանդակությամբ նպաստեցին Թեքեյան Կենտրոնի կառուցմանը: Երախտապարտ եմ բոլորին իրենց անկեղծ նվիրումի եւ աջակցության համար:
Այժմ արդեն, երբ ակնառու եւ անվիճելի են սփյուռքի եւ Հայրենիքի համագործակցության արդյունքները, կոչ եմ անում բոլորին, հատկապես երիտասարդ սերնդին, որը հաջորդելու է մեզ վաղը եւ շարունակելու է մեր սկսած գործը` լինել հայրենասեր, միասնական եւ վճռական, թեւ ու թիկունք կանգնել Հայաստանին եւ Արցախին, երբեք չվարանել օգնելու եւ նվիրվելու, առաջնորդվել այն գաղափարով՝ որքան Հայրենիքը կարիք ունի ձեզ, ապա առավել դուք կարիք ունեք Հայրենիքի: Սա է մեր հարատեւման եւ հետագա հաջողությունների գրավականը:»
Վ. Ուզունյան